اِس دھرتی نے اپنی جھولی ماں اَن گِنت مخلوق نا لوریں دے دے کے پالیو بھوسیو تے جوان کیو۔کئی قوم تے طبقہ اِس کی جھولی ماں کھیڈتاں کھیڈتاں ابدی نیند سو گیا۔عروج تے زوال; کا گھُمن گھیر کی تقدیر کی یہ کھیڈ کچّا تندُاں ہار ٹُٹتی تے بنکتی رہیں تے جِت کِدے یہ تندُو ٹُٹ جائیں اُتوں زندگی کو اوکھو لمیرو پینڈو شروع ہو جائے تے پھِر کوئے جیالو سوچجو ہی کچّا تندُواں کی ڈور بنا کے زندگی کا چرخا نا پھیرے تے تانو پیٹو تیار کر کے واہ تانی تَن جائے جھڑی رہتی نسلاں توڑی نہ صرف بنکی رہ بلکہ قوم کا اِسا سپوتاں کا مان; بڈیار نا ہمیشاں اُچو تے سجرو رکھے۔اِس تانی کو ہر ایک تندُو جِت قوم کا خیر خواہ،ہمدرد تے بہادر سپوتاں نا پِینگ کا جھُونٹا دے کے عزت کا اشماناں توڑی لے جائے اُتے ہی ظالماں تے غاصباں کا گاٹا کی پھائی بھی بنے۔یوہ جدو جہد کو وہ سیلاب ہے جس ماں کئی قوماں کا بیڑا صدیاں توڑی پانی ہیٹھ گڑُوند ہو جائیں تے کئی ڈُبیا وا دندے لگ جائیں۔یاہ ہی جدو جہد محکوم نا تخت پر بسالے تے تخت توں بخت دَسے۔ قدرت کا اِن کھیکھناں نا گُجراں نے بھی نہ صرف اپنی اکھیں دیکھیو بلکہ اِس کا سیک نا اپنا سیناں ماں محسوس کیو۔بے مہریاں کا اِس گھُمن گھیر ماں گوجر قوم نے کئی پھیر پرت دیکھیا۔محلاں ماں راج تاج بھی دیکھیو تے تتی ریت کی ساڑ بھی جھَلّی،پہاڑاں شِنگراں کا قضیا بھی دیکھیا تے کَچّا کوٹھاں تے چھپّر کُلّاں کے اندر خانہ بدوشی کی زندگی کی مار بھی جھَلّی ور ایکن گل پر رج کے بڈیار کیو جا سکے جے ماں کا اِن جیالاں نے بھانویں سُکھ چین تے تخت تاج تج چھوڑیو ور اپنی وراثت ،ایمانداری ،غیرت تے دلیری نا دوجاں کا بوہاں پر رُلن نہیں دِتو۔زِندگی کا اِس اوکھا تے اوَجّا پینڈا ماں اِنھاں نے ثابت کر دِتو جے اِن کی رگاں ماں دوڑتو لہو ٹھنڈو نہیں ہویو تے نہ ہی اِن کی وراثت کو پھُل جھونسیو ہے۔یہ صرف ہالی مانجھی تے آجڑی ہی نہیں بلکہ ماہلیاں پر پیدا ہون آلا ویہ ست رنگیا پھُل ہیں جن کی خوشبو کا ہبکارا تے سنہیپ توں بغیر محل بھی نہیں سوہبتا۔یہ اپناوطن; کا محافظ،لِساں مظلوماں کا مددگار تے ظالماں واسطے ننگی تلوار ہیں۔جِن سپوتاں نے قدرتی حُسن نال دھوئی دھائی دھرتی پر اکھ اگاڑیں ویہ اپنے در اُٹھن آلی میلی انگلی نا کَد برداشت کریں۔اِن جیالاں نے کِدے شِنگراں ماہلیاں کی جھولی ماں اکھ اگاڑیں تے کِدے پیر پنجال; کی بُکل ماں پاسو پرتیو۔کسے نے مارُو کنڈی کو تتیار جھَلیو تے کسے نے بیابان کچی بستیاں کا بختاں ماں اکھ کھولیں۔ اِن جیالاں نے جوانٹڑاں ہوتاں ہی ماتریرا سلوک کی دُھستی اگ بِچوں چھڑکتی بِلکتی قوم نا باہر کَڈن واسطے جھون جگایو تے زمانہ کے سنگو سنگ ٹُرن کو چج سِکھایو۔کنڈاں بھریا اِس کنکریلا رستہ پر اپنی جان تَلی پر دھر کے کوئے جیالو ہی ٹُر سکے۔ ایک اِسا ہی سوچجا تے بھاگاں بھریا جیالا نے ایک نیک ساعت ماں وادی گُل پوش کا قطب ماں پہاڑاں کی بُکل ماں نیلا ساوا جنگلاں کی نہیش سُتھری فضا تے مِٹھا تازہ پانی کا چشماں آلی قدرتی حُسن سنگ بڈیری بھی بستی پہلناڑ وانگت ماں ایک کامل ولی حضرت میاں نظام الدین لارویؒ کے گھر نومبر/١٩٢٣ء ماں اکھ کھولیں جِت صرف اللہ ہو اللہ ہو، کی آواز کناں ماں ایک اِسو مِٹھو رَس گھولیں تھیں جِن کی مِٹھاس قیامت توڑی سجری رہ گی۔ یاہ فیض و برکات کی واہ بستی ہے جِتوں سَڑیا بَلیا تِسایاں ہوٹھاں نا رشد وہدایت کا شربت کا کٹورا بھر بھر کے بنڈیا جائیں۔جِت دُھڑکتی زندگیاں نا جِین کا مقصدکو چج دسیو جاتو رہیو ہے۔جِت چڑھی کانگاں ماں منزل پر پوہچن واسطے اپنی کشتی کا چپُو دوجاں کا ہتھاں ماں پکڑان کے بجائے اپنا جنوآں نا ڈاہڈو بنان کو سبق پڑھایو جاتو رہیو ہے۔یاہ واہ نگری ہے جِت ہیرا ںتے جواہرات کی سوداگری نہیں ہوتی بلکہ معرفت کا خزانہ بنڈیا جائیں۔یاہ اُس مردِ کامل کی بسائی بھی نگری ہے جِت حق تے صداقت کو درس دِتو جائے۔یاہ اُس ولی کامل کی نگری ہے جس نے اپنا پیر و مرشد کا حُکم پر زندگی کا سُکھ چین نا تج کے ضلع ہزارہ توں اوکھتاں بھریو پینڈو کَچھ کے اللہ تے اللہ کا رسولؐ سنگ زندگی کا تندُو جوڑن کو اوکھو دھندو شروع کیو۔عاشقِ رسولؐ تے صاحب کمال اِس ولی اللہ حضرت بابا عبیداللہ لاروی المعروف باباجی صاحبؒ نے کوئے سوا سو سال پہلاں اپنا پیر و مرشد حضرت نظام الدین ولی کیانیؒ کا حُکم نال اِس بیابان ماں قدم رکھ کے اِس نا رشدو ہدایت کی نگری بنا دِتو۔دُکھ لوکاں کا، اَکھ اُن کی نُچڑتی رہیں تھیں۔ظاہری تے باطنی درد کالجہ کو سیک بن کے اکھاں کا بانپھل نچوڑتو رہ تھو۔ معرفت کا فیض کو یوہ خزانو کائیاں شریف توں بھانویں کئی اوکھتاں تے بختاں نال لار شریف پوہچیو ور مُرشد کو حُکم تے اللہ کی رضا کامل ولیاں کا حوصلاں نا ٹُٹن نہیں دیتی بلکہ یوہ تے وہ لذت دار سفر بن جائے جس کا مُکن کی خواہش ہی نہیں رہتی۔ اِس گھونپھرا سدا بہار بُوٹا کی چھاں ماں کوئے سوا سو سال پہلاں حضرت جناب میاں نظام الدین لاروی ؒ نے اکھ کھولیں تے ولی کامل کی انگلی پکڑ کے قاعدانہ صلاحیت حاصل کیں۔ویہ معرفت تے روحانیت کا شاہسوار بن گیا۔ویہ خدا شناس تے خوش پوش درویش بھی تھا تے اُچا درجہ کا شاعر بھی تھا۔اُن کے اندر ایک اُچا درجہ کا سیاستدان، مفکر،مقرر تے رہبر کی تمام صِفات موجود تھیں۔ویہ صاحب کمال بھی تھا تے صاحب جمال بھی۔اُن کو ذہن دِین و دُنیا کا بھیت توں منّور تھو۔ جس شخص کو جَم پَل اِسا ماحول ماں ہویو وہ بھی صاحب کمال،صاحب اقبال تے صاحب جمال کیوں نہ ہووے۔اُن کی خدا دوستی،عوام پرستی تے عزت پسندی کو تارو اشماناں پر کیوں نہ لشکے۔جہڑو دو دو کامل ولیاں کی جھولی ماں کھیڈ کے تے لنگر کی سجری روٹیں کھا کے جوان ہویو ہووے وہ معرفت تے روحانیت توں سخنو کس طرح رہ سکے۔جس نا شعر و ادب تے سیاست کو ماحول وراثت ماں لبھو ہووے اُس کے اندر قاعدانہ صلاحیت کیوں نہ ہونویں۔یاہ شخصیت حضرت میاں بشیر احمد لاروی نقشبندی کی تھی جہڑی اللہ جی کا کرم نال مھاری رہبری کرتی رہی تے اُن کی رہبری کی یاہ ٹھنڈی چھاں ہمیشاں قوم کا سِر پر قائم دائم رہن کا امیداں کو دِیو لمیرا عرصہ توڑی بلتو رہیو۔ حضرت میاں بشیر احمد لاروی نقشبندی ہوراں نے اکھ اگاڑتاں ہی ایک اِسو نظام دیکھیو جس ماں جاگیرداراں، شاہوکاراں تے ذیلداراں کو ظُلم لا انتہا تھو تے مظلوم کی کُوک فریاد اشمان نال ٹکرا رہی تھیں ور چارو کرن آلو کوئے نہیں تھو۔اُن کی اپنی گوجر قوم ظُلم کا اِن جندراں ماں بُری طرح پِیسن ہو رہی تھی۔قدم قدم پر لِسّاں تے غریباں کو لہو نچوڑیو جا رہیو تھو۔اُن کی رَت کو سواد ظالماں کی جیبھ پر اِس طرح بیس گیو تھو جس طرح بھگیاڑ وجود پروں ماس دُھرنڈن واسطے مُنہ اگاڑ کے کُرکتا پھِرتا رہیں۔عام آدمی یوہ سب کُجھ دیکھ تے سہہ رہیو تھو ور ویہ کَد آرام سنگ اکھ مِیچ کے بیس سکیں جِنھاں ناگَلسُتی ماں ولی کامل حضرت بابا جیصاحب لارویؒ کی جیبھ چُوسن کو شرف مِلیو ہووے۔جنھاں کا کناں ماں پہلی اذان کسے مردِ مومن نے دِتی ہووے ،اُس کو وجود معرفت کا سُچا پانی نال بڈیرے جائے۔جس کے اندر خوفِ خدا بس جائے اُس نا دُنیا آلاں توں کے خوف لگے گو۔ یاہ ہی وجہ تھی جے میاں صاحب نے ہوش سمبھالتاں ہی رشدو ہدایت تے ادب و سیاست کا وراثتی مدرسہ ماں وہ سبق پڑھیو جس نے کَدے بھی کَنڈ نہیں لگن دِتی تے عدل و انصاف کا رستہ ماں بنگو بنن آلیں سنگلاں نا پھِنجڑ پھَنجڑ کر دتو۔اُنھاں نے مظلوماں تے غفلت کی ڈُنگی نیند ماں ہنگلاتاں نا جھون جگا کے جِین کو چج دَسیو تے ایکن اِسا قافلہ کی رہبری کی جس نے نا انصافیاں کے خلاف جھنڈو چان واسطے لک بدھ لیو تھو۔ حضرت میاں بشیر احمد صاحب ظُلم کا سیلاب نا روکن آلا قافلہ کے ہمیشاں موہرے رہیا تے اِس ماں کَدے ہمت نہیں ہاری بلکہ کئی وار سیلاب نا ہی اپنو مُنہ پرتنو پیو۔باہروں با رعب تے باٹا دِسن آلا میاں صاحب کو اندروار ڈاہڈو نرم تے درد بھریو ہے۔وراثت ماں لبھو یوہ وہ درد ہے جہڑو کسے بے بس کی بے بسی تے مظلومیت نا برداشت نہیں کر سکتو۔شاید یاہ ہی وجہ تھی جے انھاں نے حقداراں نا حق تے مظلوماں نا اِنصاف تے ظالم نا عِبرت دوان واسطے اپنا عہداں نا بھی تج دِتو۔ویہ جنگ کا میدان ماں اُس شاہسوار ہاروں جھنڈو چا لیں تھا جہڑو ظُلم تے ظالم دوہاں واسطے تلوار کمکاتو نِکلے۔اِسا شاہسوار کی گردن نا نِیون کی عادت نہیں ہوتی۔ شاید یہ ہی خَو بابا جیصاحب لارویؒ نا نظر آنویں تھیں اِسے واسطے حضرت میاں نظام الدین لارویؒ نا فرماویں ہونویں تھا جے،” بشیر نا ڈھکیا نہ کرو ،یوہ اپنا رستاں کو شاہسوار بنے گو۔”کامل ولیں باطنی نظریں سب کُجھ ہٹھ مِن لیں حالانکہ اُس ویلے میاں صاحب کی عمر مشکل; سنگ چار سال ہووے گی۔نِکاں ہوتاں کَدے کَدے اَڑی کرن پر والد محترم کی طرفوں جد کَدے سزا مِلے تھی تاں اُس کو درد کِدے محسوس ہووے تھو۔پھانٹ کَدے بشیر صاحب ہوراں کے لگیں تھی ور اُن کا سلہیٹ بابا جیصاحبؒ کی تلیاں پر چڑھیں تھا۔جس شخص کو درجو اِتنو اُچو ہووے تے ولی کامل کادِل ماں بستو ہووے اُس کو دوجاں کولوں سِر بانکو کیوں نہ ہووے۔جس شخص کی کنڈ پر مردِ مومن کو ہتھ ہووے اُس کو سینو موم کیوں نہ ہووے،جہڑو ولیئ کامل کی طبیبی ماں پَلیو ہووے وہ دوجاں کا زخماں کی کاری کیوں نہ کرے۔جہڑو علمِ معرفت کا سمندر ماں چُبی مارتو رہیو ہووے اُس کا وعظ نصیحت کو مِٹھو گھول لوکاں کا دِل و دماغ ماں کیوں نہ سِنجرے۔یاہ ہی وجہ ہے جے میاں صاحب کے چوفیری لوکاں کو ہجوم لگو رہ تھو۔بابا نگری کو یوہ وہ چن تھو جس کا چانن سنگ گوجر قوم کی غفلت کو اندھیرو چاننی ماں بدل گیو۔اُس کے اندروں پسماندگی تے آلسی کی میل دھوئے گئی۔کِتنی واہ نیک ساعت تھی جس ماں بابا جیصاحبؒ تے حضرت حاجی بابا صاحبؒ نے میاں بشیر احمد لاروی کی کنڈ پر ٹھاپنو دِتو تے پھِر پِچھاں مُڑ کے نہیں دیکھیو۔پھر کے تھو حیاتی کو بامقصد تے بے خوف سفر شروع ہو گیو۔خودداری تے دلیری کا جھنڈا اُچیرے جھُلن لگا تے چھیکڑ مظلوماں کی وکالت کرن آلا نا اللہ نے آپے مُنصف بنا دِتو۔اقتدار بوہا کی دروٹنی پر بیس گیو تے کئی جھکھڑاں نے اپنا مُنہ پرت لیا۔اِس ڈاہڈا تے برکتیلا سینہ ماں مظلوماں کی ہمدردی، قوم کو لِیو، دُور اندیشی تے سیاسی چج سب کُجھ بھریووو تھو۔اُن کی اکھ پھَٹی گُڈی تے لوہندری لاہندری انسانیت کا درد نا دیکھ کے اُس سیلاب کی تلاش ماں تھیں جہڑو اپنی کانگ ماں دِلاں نا لُوسن آلیں بھکھتی انگیٹھیاں نا روہڑ لے جائے تے ٹھنڈا ٹھور باٹا دِلاں ماں مہر محبت تے حق پرستی کا نشان چھوڑ جائے۔واہ خواب، واہ تلاش اللہ نے پوری کی۔میاں صاحب اندھیرا ماں بیس کے خواب تکن کا عادی نہیں تھا بلکہ اِن خواباں کی تعبیر واسطے جد بھی لوڑ پئی بے خوف نِکل جاتا رہیا ۔جِن کا ارادہ اِتنا پکیرا تے سُتھرا ہونویں ویہ پَڑیاں کا سینہ چِیر کے اپنا رستہ کَڈھ لیں۔اُن کی اِن قاعدانہ صلاحیتاں واسطے ‘پدم بھوشن’کو اعزازچِرکیرو ہی سہی ور حق بجانب تھو ۔مرکزی تے ریاستی سرکاراں نے میاں بشیر صاحب کی خدمات نا دیکھتا ںواں اُنھاں نا26 جنوری /2008 نابھانویں پدم بھوشن سنگ نواز کے دُور اندیشی تے حق شناسی کو ثبوت دِتو ہے ور میاں صاحب کی چھاتی پر لگ کے اِس تمغہ کی شان یقینا اُچی ہو گئی ۔خدا کا نیک تے پیارا بنداں کا مِشن کسے انعام یا تمغہ واسطے عمل ماں نہیں رہتا بلکہ ویہ اللہ کی رضا واسطے اُس کی مخلوق کی خدمت واسطے ہونویں جِن کو صِلو دوجہاناں کا خالق کول ہووے۔جس نا اللہ عزت دے اُس نا کاہنہ کو گھاٹو ہے۔ میاں صاحب کی قومی خدمات کسے طمع لالچ یا ناں بَری کی محتاج نہیں۔رُوح رجیو ہووے تاں وجود نا مَتی حِرص نہیں ہوتی تے فیضی کو سمندر چھَلیں مارتو رہ۔میاں صاحب نے پدم بھوشن کا اعزاز کی یاہ پگ پوری قوم کے بدھائی تے اپنی زبان توں تصدیق کی جے یوہ میری قوم کو اعزاز ہے۔ریاست جموں کشمیر توں ویہ چوتھی اِسی شخصیت تھا جنھاں نا قومی خدمات واسطے مُلک کو یوہ تیجو بڑو سِول اعزاز دِتو گیو ۔اِس توں پہلاں 1962ماں نامور تعلیمی ماہر سیّد آصف علی اصغر فیاضی کا سینہ پر پدم بھوشن کو تمغو سجایو گیو تھو۔اس توں بعد لفٹیننٹ جنرل ٹی۔این۔رینہ نا ١٩٧٢ئ ماں عوامی خدمات واسطے تے ٢٠٠٥ئ ماں ادب تے تعلیم کا شعبہ ماں یوہ اعزازجناب بلراج پوری نا دِتو گیو تھو۔ اصل ماں اَڑدجیؔ کی مسِیت ماں بابا جیصاحبؒ کی دتی بھی گَل سُتی کو یوہ میوو اُنھاں نا جھولی بھر بھر کے لبو جس کو بِیج ٣ ربیع الاول کے دھیاڑے بروز اتار ١٩٢٣ مطابق ١٩٧٩ بِکرمی نا انگوریو تھو۔دادا پوتا کا پیار و محبت کو ہٹھو بابا جی صاحبؒ کا اِس شعر توں با خوبی لایو جا سکے۔
ر۔ رُخصت ہون تھیں پیش اگے اَساں دِل دِیا ںخبراں دِتیاں وے
دس بجے اُٹھ روان ہوئے جدوں رِزق مُہاراں چھِکیاں وے
شا ید بشیر ہوسی دلگیر ڈاہڈا گلاں یاد آون مِٹھیاں مِٹھیاں وے
عبدؔ لِکھو حال احوال سارا نالے لِکھو بشیر دِیاں چِٹھیاں وے
چار سال چار مہیناں کی عمر ماں ہستو کھیڈتو مہر محبتاں کو یوہ البیلو سنگ لمی جدائی ماں بدل گیو ور دوجی بکھی میاں صاحب کی خوش بختی جے اپنا والدِ محترم ولیئ کامل حضرت میاں نظام الدین لارویؒ کی ٥٢ سال صحبت نصیب ہوئی تے اُنھاں کی سر پرستی ماں ہی جِت معرفت تے رشد و ہدایت کو سبق سِکھیو اُتے ہی سیاسی صلاحیتاں کو چج بھی سِکھیو۔جوانٹڑاں ہوتاں ہی ذہنی صلاحیتاں کو دائرو وسیع کیو تے سود خوری کے خلاف جنگ کو اعلان کر کے غریباں تے مظلوماں کی ڈاہی بنیا۔کئی اُچی اُچی مایا ناز ہستیاں کی مجلساں ماں اپنی اہلیت کو سِکّو منوایو جِن ماں محترمہ اندرا گاندھی، راجیو گاندھی، شیخ محمد عبداللہ، بخشی غلام محمد، سیّد میر قاسم کا ناں خاص طور پر لیا جا سکیں۔شیخ صاحب آپ بھی درویش صِفت انسان تھا ،ایکن ہی نظر ماں تاڑ گیا تے میاں صاحب نا علاقائی صدر بنا دِتو ور علاقہ کی نشاندہی نہیں کی۔یہ ویہ شیخ عبداللہ تھا جنھاں نے ایک واری طالب علمی کا دور ماں اپنا سنگیاں سنگ رَل کے عید گاہ سرینگر ماں کُجھ سادہ بکروالاں پر جنھاں نے پالکی ماں ایک خدا دوست نا چایووو تھو ، شرارت کی نیت سنگ پتھر مارن کی سوچ بنائی ور یوں ہی کولے پُجیا تے پالکی ماں بیٹھا شخص نے دیکھتاں ہی کہیو جے تیرو یوہ کم نہیں ہے بلکہ تیرے کولوں توں مُچ اچیرو کم لینو ہے۔یاہ گل سُنتا ںہی شیخ صاحب حیران رہ گیا جے مھاری اندر کی گل اِنھاں نے کس طرح تاڑ لی تے مِناں کس کم کو اِشارو دے رہیا ہیں۔اپنی شرارت توں باز آ گیا۔پالکی ماں یاہ خدا دوست شخصیت قطب العارفین حضرت بابا جیصاحبؒ کی تھی۔چان چک شیخ صاحب کی سجی باہنہ نا درد ہو گیو تے ویہ لار شریف پُج گیا تے بابا جیصاحبؒ نا فریاد کی۔انھاں نے مُشکتاںفرمایوجے جا لنگر کی روٹی تے لسّی لے ٹھیک ہو جائے گو۔اُس ولی اللہ کی انگلی پکڑکے جس نے ٹُرنو سِکھیو ہووے وہ زندگی کی دوڑ ماںلمی چھال کیوں نہ مارے تے کامیابی اُن کی قدم بُوسی کیوں نہ کرے۔ بس پھِر کے تھو قوم کی خدمت تے اِس نا جھون جگان; کی سبیل کو سفر شروع ہو گیو۔1947توں پہلاں میاں صاحب نے گوجر جاٹ کانفرنس کی مجلساں ماں اپنا بُزرگاں سنگ شرکت کر کے قوم کا دُکھاں درداں تے اوکھتاں نا ہٹھیو پرکھیو تے اِن کا نمیڑا کی سبیل بھی سِکھی۔یہ مجلس پونچھ، پروڑی راجوری تے جموں ماں ہوئیں تے میاں صاحب اِن ماں پوری دِلچسپی سنگ شامل ہوتا رہیا۔
1947 کاغدر نے ملک نا لہو بچھوڑ تے عوام نا کھِنڈ کھیروں کر چھوڑیو تھو۔جس نا جِئیاں رستو لبو دوڑ پیو۔گھروں بے گھر ہو گیا۔ریاست جموں کشمیر کا سرحدی ضلع خاص کر کے پونچھ جس ماں اُس ویلے راجوری کو علاقو بھی شامل تھو اِس افرا تفری ماں جھکھڑ ماں بُری طرح تحس نحس ہو گیا۔شیخ صاحب نے سردار بُدھ سنگھ تے محی الدین ہمدانی نا اُجڑیا لوکاں نا بسان واسطے ٹوریو ور ویہ نوشہرہ توں اگے نہیں جا سکیا تد شیخ صاحب نے یاہ ذمہ داری میاں صاحب نا سونپی۔
جِن کا اِرادہ پکیرا ہونویں اُن کا رستہ آپ مُہارا سہل ہو جائیں۔والدِ محترم کی گونا گون تربیت نے اِن کا ذہن نا اِس طرح پلونسیو وو تھو جے خود اعتمادی کی طاقت وجود نا ہمیشاں کوسو رکھے تھی۔پیر پنجال کے رستے سخت اوکھتاں ماں جان تلی پر دھر کے ایک بکھی وطن کی کھِسکتی کنداں نا موہنڈو دِتو تے دوجی بکھی اُجڑیا پُجڑیا لوکاں نا بسا کے اپنی قاعدانہ صلاحیتاں کو ثبوت دِتو۔میاں صاحب کو آپ یوہ کہنو ہے جے اِس کم ماں اوکھت تے سخت آئیں ور الحمد الِلّلہ مایوسی نہیں ہوئی۔
یہ ہی ویہ قاعدانہ صلاحیت تھیں جِن سنگ ویہ چار بار اسمبلی واسطے چُنیا گیا۔1967 ماں پہلی بارکنگن حلقہ توں اسمبلی واسطے چُنیا گیا۔١٥ فروری /1971نا پہلی وار بروز سمار سویلے دس بج کے دس مِنٹ پر نائب وزیر کا عہدا کو حلف لیو۔14 مارچ / 1972نا ستاراں ہزار ووٹاں کی اکثریت سنگ دوبارے اسمبلی واسطے چُنیا گیا تے دو اپریل 1972نا وزیرِ مملکت کا عہدہ کو حلف لیو۔پھر 1977 ماں دوبارے چناؤ جِتیو تے چوتھی بار بھی چناؤ جِت کے قوم کی خدمت ماں لگا رہیاور ١٩٨٠ء ماں وزارت توں استیعفو دے کے اپنا اصولاں کی اُچائی نا برقرار رکھیو۔میاں صاحب نے وزارت بھی دیکھیں۔سیاسی جماعتاں ماں اُچی تھائیاں پر کم کیو ور کَدے بھی اپنا ضمیر تے اصولاں کو سودو نہیں کیو۔ویہ بھانویں وزارت ماں ہونویں تھا یا اقوامِ متحدہ ماں ملک کی نمائندگی کرتا ہونویں تھا،ریاستاں کا دورہ پر ہونویں تھا یا تصّوف تے معرفت کی مجلساں ماں بیٹھا ہونویں تھا، اُن کا ذہن ماں اپنی قوم کی بد حالی نا بدلن کی سوچ گھُمن مارتی رہیں تھیں۔ویہ اِن مجلساں ماں اپنی قوم کا نین نقش بناتا رہیں تھا۔یاہ ہی وجہ تھی جے اُنھاں نے عہداں کی غلامی قبول نہیں کی بلکہ عہداں نا اپنی مرضی کے مطابق نِبھایو تے جد یہ راس نہ آیا یا اصولاں کا رستہ ماں روڑا بنن لگا تاں جھٹ تج کے اپنو پَلّو چھڑکا لیو۔قِبلہ میاں صاحب کو اپنو کہنو ہے،” ایک واری ہوں ریل کو سفر کر رہیو تھو تے ایکن سٹیشن پر دیکھیو جے ادھ ننگا لوک خدا کا بنایا وا اشمان ہیٹھ ٹھنڈ تے بارش ماں اپنا بچاں نا لے کے ایکن چادر ماں سُتا وا ہیں۔کوئے فِکر اندیشو نہیں۔اِس حال ماں بھی ویہ مستی کی نیند سُتا وا ہیں۔جھٹ ذہن ماں خیال آیو جے امیر اپنا بنگلاں ماں پیساں کا پھیراں ماں اُلجھیا مروڑا کھاتا تے پاسا پرتتا رہیں۔” یوہ وہ منظر تھو جِت ایکن بکھی غریباں تے لاچاراں کی بے بسی پر ترس آوے تھو تے دوجی بکھی اِس کا ذمہ داراں کا ظُلم کے خلاف اپنا آپ نا وقف کرن کی تڑپ دِل ماں انگڑیسی۔
یہ ویہ سُچا تے اُچا جذبہ ہیں جہڑا ایکن انسان نا عارفاں تے ابدالاں کی صف ماں لے کھلو کریں۔میاں بشیر احمد لاروی صاحب جاگتاں لوکاں کا ہاڑا روڑیاں تے دُکھاں درداں کی بھیالی کرتا رہیا تے رات معرفت کا سمندر بِچوں اِن کا نچھیڑا واسطے موتی بٹیلتا رہیں تھا۔کَدے کَدے سبیل سوچتاں سوچتاں اکھ نُچڑن لگ جائیں تھیں۔الحمدلِلَّلہ گوَشہ نشینی ماں کِریا آتھروں تے زبان توں نِکلیا لفظ خلقت کی اَڈی بھی جھولیاں ماں فیض و برکات کی بارش براہتا رہیا تے قِبلہ میاں صاحب کی امیداں کی کِرن کَدے مدھم نہیں ہوئیں بلکہ اِن کو لشکارو بدھتو رہیو۔اللہ نے اُن کی ہر اپیل تے دعا نا قبول کیو۔
میاں صاحب اپنی مظلوم قوم کی بدحالی نا دُور کرن; واسطے تعلیم نا ایک بڑو ذریعو سمجھیں تھا تے اکثر مریداں کی مجلساں ماں بچاں نا سکول ٹورن تے صوم صلوٰۃ پر پابند رہن کی نصیحت کرتا آیا ہیں۔ویہ آپ سادگی پسند تے خوش پوش تھاتے دوجاںکی بھی حسبِ توفیق خوش پوشی نا عزت مان;سمجھیں تھا۔ سُتھری تے اُچی سوچ پاک وجود ماں ہی لمیری اُڈاری مار سکے تے آپ سہیڑی بھی گردس توں بچا سکے۔میاں صاحب کو بیاہ بھی سادگی سنگ پہلاں توں ہی تن پر لگا کپڑاں ماں ہی 1942ماں چوہدری غلام حسین لسانوی کے گھروں ایک ہزار روپیاں کا مہر ماں ہویو تھو۔اُس ویلے ویہ کرہڈ گراں ماں میاں حبیب کے گھر تھا تے اُتوں لسانہ واسطے ٹُر گیا تھا۔میاں صاحب اکثرسفید لباس نا مُچ پسند کریںتھا۔شاید اِس واسطے جے اُن کو اندر بھی پاک تے سفید تھو۔سُچی سوچاں کی اُچی پینگاں پر جھُوٹا لین آلا میاں صاحب کا شوق بھی اچیرا تے البیلا رہیا ہیں۔گھوڑ سواری کو منڈھوں بے حد شوق رہیو تے اپنا اِس شوق واسطے جِت چنگا گھوڑا کی خبر سُنیں تھا اُس کی خریداری واسطے اُتے ہی پوہچ جائیں تھا۔اُن کی یاہ شوق اخیری وقت توڑی جوان رہی۔ویہ سیال ماں جد بھی جموں آنویں تھا تے سواری کو گھوڑو نال لیاویں تھا تے جموں شہر کی باہروارلی سڑک پر خوب دوڑاتا رہیں تھا۔دوجو شوق کتاب پڑھن تے جوڑن کو رہیو۔اُن کی اپنی خصیری لائبریری ہے۔نِکاں ہوتاں استاداں کولوں بچن تے کھیڈن واسطے وقت کڈن کی خاطر جِن کتاباں نا تندُور کو بالن بنا کے کئی واری قِبلہ والد محترم کی مار کھادیں اُتنو ہی بعد ماں اِن نا پڑھن ماں سکون محسوس کیو۔میاں صاحب خواجہ حسن نظامی کا ادب،حضرت پیر مہر علی شاہ گورلہ شریف کی کتاباں تے پیر جماعت علی شاہ علی پور کی کتاباں تے ہدایتاں توں فیضیاب ہویا تے شاعراں کا قلمی نسخہ اکٹھا کر کے’نِیرسمندر’ کی پنج جِلد چھپوائیں۔اللہ نے دو بار حج واسطے سفرِ بیت اللہ کو موقعو دِتو۔صوفیاں کی مجلس تے اولیا کِرام کی زیارتاں کو دیدار بھی من موہنی عادتاں ماں شامل رہیو ہے۔
قِبلہ میاں صاحب کسے ایک شخصیت کو ناں نہیں بلکہ کئی واری انسانی ذہن گھرانی کھان لگ جائے جے یوہ کِس شخصیت کو کہڑو روپ رنگ ہے۔عابداں ماں عابد، سیاست داناں ماں اُچا درجہ کا سیاست دان، ادیباں ماں اعلیٰ درجہ کا ادیب تے ادب شناس، معاملہ فہم، دُور اندیش،جِن کو ہر قول السیر تے ہر نظر تریاق ہے۔جِن کی سوچ اُچی تے سُچی تے ٹور بانکی ور نظر دھرتی پر،جِن کو کمال لا زوال; تے اقبال بے مثال ہے۔اِس گھونپھری شخصیت کا ایکن رنگ پر گھنٹاں گل کی جا سکیں تے پوری کتاب لِکھی جا سکی۔میاں بشیر احمد لاروی نقشبندی کی شخصیت نا مولانا مہر الدین قمرؔ کا اِن شہراں سنگ ہٹھیو پرکھیو جا سکے:
توں ہے قوم کو فخر تے ناز پرور توں ہے قوم کی دِھیر بشیر صاحب
شرم لج ہے قوم کی ہتھ تیرے توں ہے خان امیر بشیر صاحب
توں ہے شہسوار سیاستاں کو تیری کنڈ ہے پیر بشیر صاحب
پیر شیر ہے توں نگہبان تیرو قادر رب قدیر بشیر صاحب
صاحب حال تے مرد کمال توں ہے صاحب لفظ فقیر بشیر صاحب
لائق فخر ہے ناں گراں تیرو تیری شان کثیر بشیر صاحب
تیری جرأت جرار بہادری کی مِلتی نہیں نظیر بشیر صاحب
اُچی شان اُچو خاندان تیرو ہوا زیر شریر بشیر صاحب
بابا نگری کا اِس چن کی چاننی کو ٹھنڈیار تا قیامت رہن تے روحانیت کا فیض نال قوم کی جھولی بھرن کی جہڑی آس قوم کا ہر فرد نے لائی بھی تھی چھیکڑ اس آس کا تندُو اس ویلے ٹُٹ گیا جد١4 /اگست 2021 رات ساڑھا اٹھ بجے یاہ بے خبری سُنی جے حضرت میاں بشیر احمد لاروی ہور دُنیا تیں پردو فرما کے اپنا مریداںکا کالجاں نا لِڑکیں لِڑکیں کر گیا ہیںتے انھاں نا آتھرواں کی سوغات دے کے ہمیش واسطے اکھ میچ گیا ہیں۔اک سوٹھو ضرور ہے جے انھاں کافیض و برکات کو دریا ہمیشاں چھَلیں مارتو رہ گو۔آمین ثُم آمین۔
